Es is faszinierend, wos ma ois findt, wonn ma in sein Zimma a wengal tiafa grobt. Zum Beispü an Pock Uroid-Posta (nie gnumma, deswegn quasi druckfrisch) aus diverse Schundheftln (btw: Und des hoaßt Rennbahn Express und ned Xpress. Aus Basta). Lauta Leid, die ma nia sondalich gfoin haum oda die ma schau domois koa Begriff woarn. Mittlaweile san ca. neinzg Prozent davau in da Vasenkung vaschwundn (do wü i jetzt goar ned von sowos wie BroSis redn… oba: Woaß irgendwer obs den Eminem-Typn nu gibt?) oda mochn nur mehr auf traurige Oart und Weise Schlogzeiln (i sog netta: Britney).

Najo. Hob die Posta wieda in die Lodn, aus der’s kehma san, zruckgstopft; vielleicht kriagns jo irgendwaun amoi Sötnheitswert (oda haumdn sogoar schau). Oda oba die Leid frogn si in hundat Joahr (so wia i mi zum Tei schau jetzt) wer zum Teifi des gwehn sei soid.