Oiso: Des is mei mittlaweile dritta Blog (Bloqu), desmoi in meina Muttasproch, da Mundoart. Mein Hauptbloqu findts auf http://ichbloque.wordpress.com. I hoff natürlich, dass i a in ana ned wirklich reglementiertn Sproch wia im (obaösterreichischen = mittelbairischen) Dialekt hoibwegs vaständlich schreib. Wia si des gaunze entwückit, des hoaßt: ob i daun wirklich olle Blogs regelmäßig fiattat, werdn ma jo sehgn. Des oanzige wos passiern kau, is, dass do beim Hoaglzipf wieda zuagsperrt wird.

Do drängt si jetzt natürlich die Frog auf: Warum „Hoaglzipf“? – Erstns: I bin oana. Zweitns: I find es is so a richtig schens Mundoart-Wort – vor oim, wei mas ned bzw. nur umständlich auf Hochdeitsch übasetzn kau. Des Foto do obn san übrigns meine Fiaß bzw. Schuach, olladings in am Laund, wos wieda gaunz aundas redn – in Italien, genaua gsogt in Florenz vorm Palazzo Pitti.