Heid hob i a großes Restlessn vaaunstoitet. Oiso, jo, groß… najo. Für mi söba hoit. Den letztn einsaumen Polardorsch „Serbische Art“, fünf Hendlleichnteile (vulgo Chicken Nuggets) und dazua a Brod, wei des gheart weida, sunst wirds jo hoart. Am Obnd kunnt i ma nu die letzte Mini-Pizza oda den letztn, a einsaumen Wurschtknedl mochn. Und näxte Wochn muaß i daun moi wieda Tiefkühlzeig eikaufn geh. Damit wieda a Zeig fürs näxte Restlessn zaumkehma kau.
Ma kunnt jo direkt moana, i bin übahaupt nimma hoaglich, so weng wie si beim Hoaglzipf in da letztn Zeit tuat. Ned guad, goar ned guad. Oba irgndwie haundln jo die meistn von meine letztn Einträge do herinn von dersöbn Problematik: Es kummt nix, außa ebn i schreib eina, dass nix kummt.
A Mundoart-Blog. Wie bin i eigentlich domois auf die Idee kehma? Sowos Hirnrissiges. Oba i mogn trotzdem. A wonn en ned grod pfleglich behaundlt. Hm. Jo. Soweit dazua.
